Buy Me A Sunday
轉千灣　轉千灘--關於上海（和我）的誤解

甫出浦東機場，一上車，我就問駐上海的香港人 A小姐：「上海的裏原宿在那裏？」
？？？？？？？？？？？？？？？一時間問號逼滿了七人車車廂，幾乎爆窗而出。
她打了好一輪電話，問了好一班人，得出的結論是：「長樂路」，不忘補飛：「我的意思是，最接近裏原宿的地方，不過不要期望太高。」

為甚麼不要期望太高， 04年我來上海時，晚上浦東一帶的天橋陣，讓我以為自己在東京。給這個 supposed吸收力最強的城市 5年時間，我為甚麼不可以期望這裏有個 70%的裏原宿呢？
結果，我真的錯得交關，那條街甚至不似 1985年的裏原宿。但整個上海，就 shopping來說，不盡令人失望。

混作滔滔一片潮流──長樂路

翌日，一下車，對面馬路那間時裝店叫「 Sex& The City」已知瀨嘢，幾個門牌之後的一間，是個在大街大巷賣 B貨名牌鞋（甚至不是 A貨呀吓）的專門店，但冒牌冒到 Number(N)ine和 Mihara Yasuhiro，而不只是 YSL與 Miu Miu，都算冒得有 sense，知識產權的尊重沒有突破，品味也至少進步。
再行 50步，來到傳說中最潮的日本水貨店，叫 Monday，盤貨算 OK，可惜改壞了中文名，南方人一定大吉利是過佢──她的中文店名叫「梅西」，是我所知道唯一可與「蘭茜」匹敵，甚至更壞的中文譯名。
好的名字也有，對面街有間「 Even Penniless」，直譯廣東話「就算仙都唔仙吓」，有傲氣有台型。
真正又潮又正版的是我朋友內地潮人李晨與潘瑋柏開的 N.P.C.，裏面好些 Nike甚至比香港更快更新，自家品牌也有水準，希望真能靠他撐出一個中國裏原宿，對，距離真的那個，還真的要出力撐一撐。

放大圖片

最潮的日本水貨店叫「梅西」真係啋過佢，叫 Monday咪好地地囉，還是隔鄰的「食為先」老套、正氣而 international。

放大圖片

叫人帶我去上海「裏原宿」，一下車見到這間「 Sex& The City」你都咪話唔驚。

愛你恨你　問君知否──淮海路迷途事件

《蘋果》時尚版的 M編輯問我：「乜你去上海唔係睇 Barbie咩？」
我真係有咁似鍾意玩 Barbie咩？……真係冇你咁好氣（詳情請參閱 08年 7月 27日的本專欄）。
不 過問心，在今個 trip中芭比的 priority是幾高的。事關地膽指引，去淮海路即可滿足三個願望：１.見 3,000個 Barbie飲 Barbie茶做埋 Barbie Spa； 2.見識由前上海民航局古蹟活化得來的 Dunhill及江詩丹頓新店； 3.放下一嚿嘢在 Swarovski這間上海旗艦，幾日後回來它就變成 bling bling了。
由於 3是上到來才知，並無預備別出心裁的「一嚿嘢」，加上我們好 man的司機大佬來回淮海路幾千遍眼中只見過 Dunhill，對 Barbie鬼揞眼，所以我們的節目只得 2。
Dunhill新店有如一齣古裝片佈景，其實去吓也無妨，不過如果新設計師 Kim Jones的作品趕得及贈興就更好啦。
而 世事，總是這樣的，回港那朝往機場途中，天一定會安排你經過「哎吔，原來喺呢度呀」的景點，所以如果你下次好想去一個地方，例如 Barbie博物館，你一定要大大聲聲話唔想去，正如你每次出街食飯，已經食飽但醒起仲有碟嘢太耐未嚟，記住同夥記話「唔該幫我 check check碟乾炒牛河，如果未落單就麻煩你 can……」保證個「 cel」字講完之前，碟嘢就會冒住白煙咁撻喺你面前。

放大圖片

其實想找更好的芭比紀念品可回港才找 Bauhaus，他們的這件 Jeremy scott x Barbie的乾濕褸我都想搵件 XXL。

放大圖片

Alfred Dunhill（上海淮海路 796號）

在我心中起伏夠── DIY Couture

你估也估不到得到一件名師設計的 Haute Coutrue最平的地方是那裏？上上海，不，其實上大陸任何地方都得。我最鍾意研究各地的雜誌如何用有限的成本做出各種「喧賓奪主」的贈品嘅，當中以這個最令我佩服。
中 國大陸版的《 Madame Figaro》真絕，當別人挖空心思計劃下個月送人字拖還是晾衫夾時，她只出一招，期期同一招而且是成本最低的一招，已殺晒。證明點子仍是比銀紙重要的。 冇嘢，她每期只是送出一張紙，上面畫了幾條線，就這樣。原來是各大時裝大師的紙樣，有些還是走過 catwalk的款式，有了它你便可以 DIY（或畀師傅做）一件 Alexis Mabille（ 7月號）的招牌 bow tie details的晚裝裙（下右圖），原價點都兩皮幾嘢。

放大圖片

Alexis Mabille是巴黎近年的當頭起，而《 Madame Figaro》作為一本中文版的外來雜誌，我覺得選材和文筆都是極好的，值得留意。

放大圖片

本周贈品

我當然知道很多人是為了贈品才買雜誌的，所以特地揀了件你或者想要的贈品，那是個有關上海的故事。
幾年前試過回大陸拍電影，豪氣干雲一拖六（助手）的女主角見我孤伶伶一條友上來捱世界（其實我是 OK的），二話不說，某日開開吓工便殺出一名妙齡少女，跟我說：「 XX（女主角）叫我過嚟服侍你嘅，呢幾日你有乜嘢斟水拎袋擔凳，即管吩咐我做。」語氣帶幾分粵語長片。
我不慣被貼身服侍，便謝絕了。
幾天後我收工回港，原定來接我去機場的車拋了錨，好在女主角肯出動私人保母車送我一程，由於順路回酒店，她也坐在同一架車上送我。
45 分鐘車程才過了三分一，閒偈已傾完，冷不防好客的女主角忽然轉話題：「講個秘密你知吖，我讀中學嗰陣只鍾意兩個男明星㗎咋，淨係佢兩個我先會專登坐車出信 和買佢哋啲相㗎咋，一個係陳小春，另一個你估係邊個吖……（都未等我答）……係你呀！」講完為加強效果還跟她識了十多年的私人助理說：「你都記得啦， 呵！」那助手不知所措的表情顯示呢單料其實係未聽過嘅。
我明白一齊工作大家開開心心是重要的，但都唔使老作仲作得咁浮誇係咪呀？有人說「好說話誰 不愛聽？」我！如果假成咁的話。我仍然欣賞那名女星至今，也感激她的好心，但從此之後，我知我們做不成很 close的朋友了，而且還有啲想避開㖭，唉！這是我的上海故事，贈品是，老規矩，喺街撞到我可以問我佢係邊個，就作為 season two的 coupon 1啦！
Text By黃偉文